Oordenking: Josua 3

Liewe Broeders en Susters.

Ek was gister uitstedig met verpligtinge en kon dus nie die oordenking skryf nie. Josua 3 is een van my gunstelinge!

Josua 3

v.1.. Josua en al die Israeliete het vroegoggend van Sittim na die Jordaan vertrek en daar oorgebly. Na 3 dae het die leiers die kamp deurgegaan en opdragte uitgedeel.

v.3.. Wanneer julle sien dat die Levietiese priesters die verbondsark wegdra, moet almal agterna volg. Daar moet egter ‘n 900 meter volgafstand wees...

v.5.. Josua gee opdra: reinig julle want more gaan die Here wonders doen tussen julle...

v.6.. Josua sê vir die priesters dat hulle die ark moet optel en stap voor die volk uit...

v.7.. Vir Josua sê die Here dat Hy nou aan hom hoë aansien sal gee agv wat gaan gebeur...

v.10.. Josua sê vir die volk dat hulle sal weet dat die lewende God tussen hulle is, want die vyand sal verdryf word... Die verbondsark vd Here vd hele aarde, sal voor julle uit die Jordaan in gaan... Wanneer die voetsole vd priesters wat die verbondsark dra, aan die Jordaan se water raak, sal die water vd Jordaan afgesny word en op een hoop staan.

v.15.. So het dit gebeur, toe die priesters se voete die water raak, het dit ‘n muur gevorm ... Dit was regoor Jerigo. Die priesters het toe daar binne in die droë rivier bedding gaan staan terwyl die hele Israel droogvoets deur die Jordaan trek.

* Daar is dikwels ‘n keerpunt in jou lewe. Hier is dit die oorsteek vd Jordaan die beloofde land in. Watter groot stap neem jy op die oomblik in jou lewe? Dis dikwels maar moeilik en die onbekende is die eintlike rede tot vrees.

* Hier leer die Here jou wat jy moet doen: Moenie self al jou planne beraam nie. Hou jy net by wat die Here vir jou leer. Die ark met die 10 gebooie binne-in geberg, het voor geloop onder die skouers vd priesters. Verdiep jou net elke dag in God se Woord olv die Heilige Gees.

* Hoe reinig jy jou vandag? Deur selfondersoek en gesprek in gebed met die Here. Bely daardie sonde, toon berou oor daardie sonde, bestry daardie sonde, en wees dan bevry daarvan. Die Here skenk dit vir jou. Jesus Christus reinig jou met Sy kruis en opstanding. Jy moet dit net vat, glo en aan ander oordra.

* As jy dalk sukkel om respek in ander mense se oë te verdien, moenie daarop fokus of als probeer om dit te kry nie. Jy is mooi gemaak, deur God gemaak en Hy sal dinge so beskik dat jy wel die nodige respek ontvang. Die geheim is net dat jy sy pad moet bly loop. As jy altyd konsekwenk, regverdig, ferm en liefdevol is, sal als self regkom. En as mense jou nie repeksteer nie, dit maak nie saak nie.

* Jy moet weet dat die Lewende God ook hier by jou is, deur Sy Gees is Hy in jou en met jou.

* Die Here stop die riviere van gedagtes, vrese, bekommernisse en probleme. Jy kan net eenvoudig op Hom staatmaak, agter Jesus aanloop, Sy Wil doen en kyk wat gebeur. Op die ou end gaan jy droogvoets deur die rivier waarin jy is. So het Jesus die brug gebou waaroor jy kan stap na die hemel. Hy staan wag oor jou en gee jou krag.


Ek bid dat die Here jou seën, jou riviere sal laat wal staan, en dat jy agter Jesus deur die rivierloop kan stap. Die Here is met jou.


Joop van Schaik