Oordenking: Josua 5:2-13

Liewe Broeders en Susters. Bevry is die kernboodskap, jy is bevry!


Die besnydenis by Gilgal.

v.2.. Die Here het vir Josua gesê dat hy klipmesse moet maak en al die Israeliet (mans) moet besny. Die plek is genoem die “Heuwel van die Besnydenis !”

v.4.. Die rede was dat almal wat vroeër besny was en uit Egipte getrek het, in die woestyn gesterf het. Hulle was ongehoorsaam en ondankbaar teenoor die Here en die straf was die dood. Die wat in die 40 jarige woestyntrek gebore was, was nie besny nie.

v.8.. Nadat die hele nasie se mans besny was, het hulle eers in die kamp gebly om gesond te word. Die Here se boodskap op grond vd gehoorsaamheid deurdat hulle besny is, was: “Vandag het Ek julle bevry vd smaad wat van Egipte se tyd op julle rus.” Die plek is Gilgal genoem, dit beteken: “die Here het bevry”.

Die Paasfees.

v.10.. Daar in Gilgal het die Israeliete die paasfees/pasga gevier. Die opbrengs vd die land is geëet en die manna het opgehou om elke dag te val. Kanaän se oes is geëet.

Die leëraanvoerder vd Here.

v.13.. ‘n “Man’ het aan Josua verskyn, hy het ‘n ontblote swaard in die hand gehad. Josua vra of hy vriend of vyand is. Die “man” sê dat hy die aanvoerder vd leër vd Here is. Josua buig diep en vra wat hy aan hom as dienaar wil/moet sê. Die “man” sê dat Josua sy skoene moet uittrek want hy staan nou op ‘n gewyde plek. Josua trek sy skoene uit.

* Die besnydenis is ‘n verbondsteken wat die Here gegee het. Dit moes volgens instelling op die 8ste dag na geboorte gedoen word. Vir 40 jaar is dit nie gedoen nie want die volk was ondankbaar en ongehoorsaam. Nadat die Here se straf toegepas was, moet die nuwe geslag hulle gehoorsaamheid aan Hom betoon, afhanklik van Hom wees en weer die teken van die verbond toepas.

* Die besnydenis veral vir groot mans was maar ‘n baie seer storie. Vir ‘n tyd lank was hulle buite aksie. Tog was hulle veilig want die Here het hulle Self bewaar van aanvalle. Gehoorsaamheid lei tot beskerming deur God. Dis die wonderlike, gehoorsaamheid, al is dit pynlik en in die wêreld moeilik en in die wêreld se oë sinneloos en stupid, die Here seën dit en Hy beskerm jou. Waar het jy afgedwaal? Die Heilige Gees werk in jou sodat jou gewete jou pla. Luister gerus daarna en vra die Here om jou te lei om dit reg te stel. Jesus neem dit geheel en al weg.

* Vandag is die teken vd verbond die doop. Jesus was besny en gedoop. In Hom trek alles saam. Gelukkig het ons nie meer die besnydenis nie, dis ‘n eina!. Wat wel moet gebeur, is dat jou hart besny moet word, jou gesindheid moet verander en jy moet terugdraai na God toe. Vandag word die doop aan manlik en vroulik bedien, jy is persoonlik vir God belangrik. Die water vd doop teken die afwassing van jou sondes. Dis heerlik en wonderlik om dit te weet.

* Die pasga was in gehoorsaamheid en dankbaarheid gevier, en dadelik voorsien die Here in kos en ander lewensmiddele. Die pasga was die opdrag sodat die uittog uit Egipte herdenk kan word om God se Almag weereens te besef en eer aan Hom te bring.

* Vandag het ons die nagmaal. Nou herdenk ons nie die uittog uit Egipte nie, maar die feit dat Jesus ons uit die hel red. Ek en jy behoort eintlik vir ewig van God verlate te wees, maar nou red God jou deur Sy Seun wat aan die kruis gesterf het! Sy offer is voldoende en genoegsaam. Nou herdenk ons met die nagmaal dat jou plek in die hemel klaar gereed gemaak is. Jesus het oorwin en jy oorwin. Is dit nie genoeg rede om dankbaar gehoorsaam te wees nie? JY IS BEVRY!


Baie mooi dag vir jou.


Joop van Schaik